والله وشكله الواحد الحين بيدى يوسوس يخاف يجلس بلحاله

[ولدنورة]

والله وشكله الواحد الحين بيدى يوسوس يخاف يجلس بلحاله؟؟؟؟)))))))


الواحد اذا صار لحاله بغرفة ومتأكد ان محد بشايفه تلاقيه يسوي حركات
أنواع البدع.. يعني تلاقيه يمص اصبع رجله الكبير.. والا واقف قدام المرايه ويشوف وش الأحلى الشق الأيمن من جسمه والا الشقّ الأيسر.. وبعضهم يتمادى إلى درجة انه ممكن يسوي بنفسه شي لاسمح الله... عاد ماكذب من قال: الوحدة كافرة(أخبر ماكان فيه كافر الا الجوع!!.. الحين أي شي مايعجبنا نكفّـره)..



مرة وانا بنفس الوضعية اللي قبل شوي يعني بلحالي بغرفتي وانا صافٍ سيقاني جمب بعض وأقيسهم بالمسطرة لأني حسيت ان طولهم مهوب متساوي.. وأشوف برجلي اليمين ست اصابع.. بصراحة أُسقط في يدي(نعنبوها هالكلمة مابغت تنقال).. ارتعت والله.. وش اللي ست اصابع؟!! لعب عيال هي.. وانا اللي انزل الدرج وانا ماسك رجلي بيدي واصارخ وابكي وانزل عند ابوي واقول له : يبه شف طلع لي اصبع جديدة.. ناظر فيني وقال : نزل رجلك يا كلب!!.. نزلت رجلي ومسحت دموعي وقمت أكلمه بأدب.. قال وش جاك.. قلت أبد رجلي اليمين صار فيها ست اصابع... ويوم أجي أباوريه واشوف يدّي الا هي بعد بـ ست أصابع!!.. وصارت المشكلة بـرجولي ويديني كلها.. طنّـشت ابوي ورحت لغرفتي اباشوف لا أكون أحلم والا اتخيل.. خل اتأكد بس!!..



دخلت الغرفة وجلست اناظر بجسمي.. ياولد وش هالبلوى؟ وش اللي صاير لي؟!!..
والا فخذي يحكني.. شوي وتطلع لي ركبتين جديدة!!.. وتطلع لي اشياء كثيرة في أماكن متفرقة من جسمي.. وتطلع لي اصابع جديدة بعد وخشمين وأربع عيون.. يلعن ام الحالة.. وش السالفة؟!!.. لا أكون باعيش بقية عمري أخطبوط .. خفت لا يدخل أحد ويشوفني وانا بهالحال.. وانقز جهة الباب واقفله وآخذ المفتاح وأبلعه.. وكلها خمس دقايق الا كل عضو من اعضائي فيه منه ثنين!!.. واللي اثنين صاروا أربع.. وقام جسمي يتنافض.. ويتمطط وصرت مربّـــع ثم قامت تتفكفك مني رجولي ويديني وراسي الزيادة.. وينفك مني وطيرااااااااان ويخبط في الجدار ثم رجع لي.. والا انا في واحد نسخة مني.. بس ماعنده خشم وانا في وجهي خشمين!!.. قرّب مني وقال.. بالله ممكن خشمي لاهنت.. مسكت خشمه فكيته مني ومديته له قلت: سم.. قال: سم الله عدوك.. هههههههه ماعليش ياخوك بس خبرك الخشوم من تالي صارت أعوذ بالله قلق.. الا عسى ما أزعجتك ياصاحبي.. قلت: لا والله أبد بس أول مرة أشوفني عالطبيعة ياخي... شي غريب صح..



قال : يارجال لاتقعد تتملق فيني كذا.. أباعرفك على نفسي طيب.. انا الانسان المجنون والزاحف اللي فيك.. وطلعت منك وكوّنت شخصية لحالي.. لأنك ذبحتني مسوي فيها عاقل.. وعلى فكرة ترا مابقا فيك الحين الا الزلابة العاقل ثقيل الطينة فهمت؟!!.. والا اقول لك.. عنّـك لافهمت.. أقول ياصاحبي.. ممكن تعطيني مفتاح السيارة.. قلت : ايه أكيد.. وأعطيته مفتاح السيارة وانا مفهّـي.. وياخذه ويجي بيطلع من باب الغرفة لقاه مقفل..
قال وين المفتاح.. قلت بلعته والله.. والحين مدري هو في بطني والا فـ بطنك.. قال يالله كل واحد يدخل يده من فم الثاني ويدوره ببطنه.. شمّـرنا يديينا وكل واحد دخل يده بفم الثاني.. الا صاااح فيني : آآآآآآآح.. قلت: هاه لقيته؟!!.. قال: لا بس شف.. يا إمّـا انك ماكل ضفدع قريب والا انك حامل!!.. فيه شي يعضني ببطنك.. قلت: تلايط ودور المفتاح بس.. ويطلع كل واحد مفتاح من بطن الثاني!!!.. فتح الباب أخينا في الله وطلع وهو يغني،،،



بعدما طلع قلت وش فيني انا؟؟ اعطيته مفتاح سيارتي وانا مادري هو جني والا إنسي.. والا وش سالفته واطلع ابي الحقه.. وألقى ابوي طايح بالصالة ويقوم ويجي يشوتني.. ياكلب الحين اسألك عن اصبعك واتطمن عليك تقوم تضربني وتطلع ياقليل الحيا!!.. خليته يشوتني إلين شبع وقلت فيه سوء فهم بسيط أباطلع واجي بعد شوي .. واطلع وألقى سيارة ابوي مصدومة وسيارة جارنا.. وثلاثة هنود ميتين في الطرف الثاني من الشارع!!.. وأشوفه بآخر الشارع انواع التفحيط والعقد...



ركبت سيارة ابوي ولحقت وراه ويهرب مني.. وأدوره بشوارع الرياض إليما مليت.. ويوم انا من عند العقارية واشوف سيارتي.. واوقف ابادخل أدوره الا هو خامن له بنت وفاتح باب السيارة الورّاني ويبي يدخلها وهي تصارخ مسكينة ويقعد يدفدفها ويرفسها برجله يبيها تدخل والبنت متينة ونشبت بالباب(فاهم الغزل والتطليع غلط الأخ).. قمت دفيته وأبعدته عنها واسحبها من الباب وهي اللي تناظر فيني وتمسكني براسي.. قلت : اسمعي.. فيه سوء فهم في الموضوع!!.. قالت: سوء فهم هاه؟!!.. وتصك راسها الكبير براسي.. دخلت في غيبوبة ماصحيت الا وانا بالمستشفى..



جاني بالمستشفى يزورني ومعه ورد!!.. قلت له : ياخي وش تبي من حياتي انت .. وش سويت لك عشان تسوي فيني كل هذا؟!!.. قال أبد.. انا ماسويت شي غلط ياصاحبي.. وتمر ممرضة ويمسكها ويخمها ويحط يده على فمها ويندس فيها تحت السرير واشوف الملابس تطلع يميناً ويساراً.. ويوم خلص ويطلع ويهرب من المستشفى!!.. شوي ويدخلون علي ثنين سيكورتيّـة ومعهم الممرضة وتأشر علي وتقول : هادا هادا مويه مابّـي برا!! .. وأشوفه يويّــق لي من ورا الباب يأشر لي بيده و: قاقاقاقاقاااااا ميّـــت ضحك!!!... قلت : ممكن تسمعوني.. ترا والله فيه سوء فهم صاير!!... ما أعطوني مجال اتكلم ويمسكوني الثنين ويشوتوني برا المستشفى وانا متكسّـر وحالتي حالة.. وألاقيه برا يلحق ورا بزر.. ويمشي بشويييش وراه... قلت: تعال ياهوووه.. ويناظرني ويحط اصبعه على فمه: أووووش ثمن غمز لي ويأشر للبزر.. ويلحقه .. شوي الا سمعت صراخ البزر وامه ويجي هالخبيث ركككض من جمبي.. ويجون أهل البزر ركض وراه يوم وصلوني ويمسكوني ويقول الأبو: جب الخمسمية ياكلب!!.. قلت: أي خمسمية والله مهوب انا.. فيه سوء فهم والله!!.. قال: سوء فهم!!.. هذا شي احنا متأكدين منه.. ودبغوني دبغ .. وفتشوني مالقوا معي شي أخذوا مكانها دبغ فيني زيادة ثم راحوا!!..


شوي الا جاني الملعون وشالني قال : انا اعالجك في احسن مستشفى بالخمسمية اللي معي ولا يهمك ياصاحبي.. قلت الله لايكثر خيرك انت وخمسميتك.. ياخوك وش هالبلاوى اللي تجيبها علي!!.. قال : طيب.. براحتك.. كان قصدي أخدم.. ويمشي... واناديه تعااااااااااااال تعال.. ولارجع الورع!!.. قمت ورحت للبيت وأنا اقوم واطيح..


يوم وصلت البيت لقيته مشمّــع بالسيارة حقتي في جدار الحوش.. والمسجل شغال.. وألقاه داخل السيارة.. وافتح الباب الا هو يكلم من جوالي ويقول : والله ياصاحبي ماعاد يجيني منها ولا ريال.. مسموح يابن الحلال!!.. ويقفل السماعة.. قلت منهو ذا اللي تكلمه؟!!.. قال ياصاحبي هذا واحد الظاهر متسلف منك فلوس ويبي يرجعها حلفت عليه.. أخذت الجوال منه بقوة وقلت انزل يابلوى.. الحين وش اسوي فيك؟؟ وس اللي يشفي غليلي فيك بالله!!.. قال : ايه على طاري الغليل ويشفيه.. ترا كلمت واحد من جوالك وسبيته إليــن قال آمين وتواعدنا بيجي يطقني هنا بعد شوي.. بالله اذا جا قابله!!.. ويدخل البيت.. وأجلس بالحوش أدعي ربي انه يفكني من هالبلوى اللي بلاني فيها.. وأحاول أتذكر وش الذنب اللي سويته عشان ربي يعاقبني كذا!!


حسيت فيه شي غريب قاعد يصير في البيت!!.. ويوم دخلت وألقى العجب العجاب!!.. شفت أخوي معلق برجله في السقف.. واختي محبوسة في قفص مع العصفور.. وشفت رجل ابوي مصكوك عليها باب المقلط وبقية جسمه داخل.. وأمي تبكي عند مزهرية كانت حاطتها وبالمزهرية برشومي ولعب في حسبتها بالشوك!!.. والشغالة مغطّــي راسها براد الشاهي وعلى خشمها مسّــاكة حقت نشر الغسيل وفمها مسكر بسـحّــاب حق ملابس!!..


دخلت غرفتي وانا حزين.. وكئيب.. ومقهور من هاللي قلب حياتي فوق تحت.. وودي انتقم منه بس ماني عارف.. لأنه جزء مني.. هو عنصر الشر واللعانة اللي فيني.. بس انفصل..
حس اني متضايق وطفشان.. لبس الشماغ والعقال.. وجا بيطلع من الغرفة .. بس مالقى طاقيته قام أخذ طاقيتي ولبسها... قال يالله عن اذنك.. اباروح أقابل الرجال اللي بيطقني شكل مالك خلق تقابله تامرني شي؟!!.. قلت : ماراح تسبب لي مصايب أكثر من اللي سببتها.. رح بس..



حسّــيت اني انهنت وكرامتي تمسحت في البلاط.. جُــنّ جنوني.. انهبلت.. وتطلع نار من عيوني وانط واتمسك في سيقانه واطيّــحه واشوته اشوته واشيله لفوق راسي وامغط به عالارض واترصع فـ بطنه وأمسكه من رقبته واقول له وانا أكل أسناني من الحمق: شف يا ملعون الوالدين تطق ابوي وتمشي ولا قلت لك شي.. تصدم سيارته وسيارة جارنا وتقتل ثلاثة هنود وتروح تفحط قلت يمكن غشيم او متهور ومشيتها لك.. تخطف البنت في العقارية وتخليها تغير ملامح وجهي بعدك وبرضه ماقلت شي.. وسالفة الممرضة والبزر أبو خمسمية ريال واهله واللي سويت بسيارتي وأهلي و و و و و.. كل هالسوالف والمصايب اللي سببتها وساكت لك... لكن توصل انك تاخذ طاقيتي!!.. لا وألف لا.. ألزم حدودك وحدك هنا عاد..
قال : أفا!!.. وصلت فيك النذالة كذا؟!!.. قلت ايه توصل كذا وأكثر بعد!!.. أنا وقت الجد جد.. واذا حمّـقت وعصبت.. ماا أرحم،،،، ويحط طاقيتي عالسرير ويناظر لي بحقد.. ويطلع برا الغرفة.. بس وقف عالباب وقال:











الله من (سوء فهم) بيصير لك.. ياصاحبي!!..

-----------




اللي أبي أوصل له : في داخل كل واحد فينا شخص زاحف ومتهور.. لازم نخلّـي له مجال انه يعبر عن شعوره.. قبل لايجي اليوم اللي ينفجر فيها ويطلع لحاله ثمن نبلش وكل شوي نطيح في(سوء فهم جديد).. ياصاحبي !!..
منقووووووووو(قسم بالله )وووووووووول